(л. 3об.–4об.) В предшедшая лета во 175 (1666/67) и 176 (1667/68) лето Нижняго нова града храма Успения пресвятыя Богородицы пресвитер Мокий Васильев сын, бывший послушник протопопа Иоанна Неронова, друг же протопопа Аввакума, анафеме преданнаго за пререкание и мятежи, поучаше втайне дети своя духовныя и последователи своя о крестном изображении треми первыми персты, именуя то бытии печать антихристову. Изображение же честнаго креста, еже на просфорах нарицаше крыж, бытии латинскии, и гла[го]лаше: яко аще кто по новоисправленным служебником служить, то не священ есть. Напоследок толикия хулы отрыгаше, яко и слышати страшно есть, блядословяше бо, яко аще кто от тайн по новоисправленным служебником литургии совершенныя причастится, таковый не освятится, но паче осквернится от хулы страшныя. <…> Но Бог, правды любитель, тайную его лесть явным не умедли обличити наказанием. Ибо по выше реченных летех во 177 (1668/69) лети порази лице его язвою, и уста его хульная, с челюстьми и окрестными зубов и языка частьми растли смрадным и болезненным согнием. Да ими же уды согрешаше, теми и постраждет, и пребысть в сей болезни два лета. Потом познав вину толикая казни Божия мерзкая своя хулительства и лестная учения, покаяся о них и исповеда тайно отцу своему духовному.